Mikrofluidika garrantzi handia izaten ari da biodefentsako, ingeniaritza kimikoko eta saiakuntza medikoko aurrerapen garrantzitsuenetako batzuetan. 100 mikrometroko (µm) eta 1 µm diametroko kanalen bidez fluido kantitate txikiak aztertzea eta manipulatzea ardatz duen zientziaren eremua da (adibidez, giza ile baten diametroak 100µm inguru neurtzen du).

Leartikerren osasuna espezializazioko ildoetako bat mikrofluidikan oinarritutako gailuak garatzea da. Besteak beste, gailu horien ezinbesteko zati diren konektoreak garatzen ditugu fluidoak manipulatzeko. World-to-Chip konexiorako (txipa kanpoaldearekin konektatzeko) konektore estandar bat ez dagoenean, fluidoak manipulatzeko behar den tresna-kopurua biderkatzen da.

Hain zuzen ere, arlo horrekin lotuta, Leartikerrek Euskal Herriko Unibertsitatearekin (UPV/EHU) eta mikroLIQUID enpresarekin lankidetzan jardun du “Different approaches for mass production of thermoplastic microfluidic devices“ doktorego-tesian (Gailu mikrofluidiko termoplastikoak masan ekoizteko ikuspegi desberdinak). Lan horretan, mikrofluidikan erabiltzeko materialak aztertu dira eta mota horretako gailuetarako beharrezkoak diren osagaien diseinua eta garapena ere landu dira. Proiektu honetan, Luer konektoreen (xiringak bezalako gailu medikoetan erabiltzen diren ohiko konektoreak) 7 bariazio diseinatu, fabrikatu eta aztertu dira, fluidoen ihesak saihesteko behar den itxiera-indarra kalkulatzeko eta, horrela, mikrofluidikan duten erabilera baliozkotzeko. Egindako lana berriki argitaratu da Frontiers in Medical Technology aldizkariko Medtech Data Analytics sailean (DOI:10.3389/fmedt.2022.881930).

Era berean, osagai horien garapenean zentratuta, Leartikerrek Frantziako Université de Technologie de Compiégne unibertsitatearekin batera lan egin du, gibeleko lerro zelularraren jarduera aztertzeko mikrofluidikan oinarritutako bioerreaktore bat baliozkotuz. Zentro Teknologikoa HepG2/C3A lerro zelularraren kultiborako material egokiaren azterketan eta hautaketan, eta gailu horien garapenean, zentratu da ondoren Frantziako unibertsitatearen instalazioetan baliozkotzeko.

Iturria: leartiker.com