Leintz Bailarako Ekiola ekimenak, bideragarritasun ekonomikoa bermatuta ere, bazkide berrien bila jarraitzen du proiektuak ahalik eta onuradun gehien izan ditzan. Atzo informazio saio bat egin zuten Arrasateko Amaia antzokian, bereziki bazkide ez direnei zuzenduta.
Arrasateko Garaia parke teknologikoaren esparruan eraikiko da instalazio fotovoltaikoa, eta Leintz Gatzagako, Eskoriatzako, Aretxabaletako eta Arrasateko 600 familia ingururi banatuko dio argindarra, energia fosiletatik trantsizio energetikorako saltoa emanaz.
Proiektuak 1,7 milioi euroko aurrekontua izango du, eta dagoeneko ia milioi bat euro bermatuta daude. Izan ere, Europar Batasuneko Next generation funtsetik 600.000 eurotik gora jasoko ditu Leintz Bailarako Ekiolak, baita Fagor taldearen 350.000 eurotiko gorako ekarpena ere.
Energia berriztagarria, iraunkorra eta bertan sortutakoa eskainiko du Leintz Bailarako Ekiola Kooperatibak. Arrasate, Aretxabaleta, Eskoriatza eta Leintz Gatzagako herritarrei eta komertzioei emango die zerbitzua; guztira, 600 bat familia edo komertzio txikiri.
Fagor Taldeak 335.400 euroko ekarpena egingo dio Leintz Bailarako Ekiola Kooperatibari, hark, sortzen dabilen komunitate energetikoaren hasierako urratsetarako finantza egoera sendoa izan dezan. Hala, kooperatibaren bazkide laguntzaile bilakatu da, Leintz bailarako udalekin batera. Bazkide laguntzaileez gain, bazkide-kontsumitzaileek osatuko dute Ekiola -haiek izango dute gehiengoa-. Oro har, Leintz bailarako familiek kontsumitzen duten energia bertan sortzen hastea da kooperatibaren xede nagusia, era horretan, kanpoko energia iturriekiko mendekotasuna murriztuz.
Leintz Bailarako Ekiola Kooperatibako bazkide izateko aurretiko izen-ematea abiatuko dute maiatzean. Hala iragarri dute gaur, Kooperatibaren asmoa gauzatzeko estrategikoa izango den lekuaren aurrean.
Energiaren Euskal Erakundeak eta Ekiola kooperatibak Leintz bailarako Ekiola aurkeztu dute goizean Arrasaten. Zero kilometroko energia berriztagarria sortzea izango da proiektuaren helburua eta Garaia Berrikuntza Guneko lurretan, LKSren egoitza parean, kokatuko da eguzki-parkea. Ekitaldian parte hartu dute Arrasate, Aretxabaleta, Eskoriatza eta Leintz Gatzagako alkateek, ekimenarekiko euren konpromisoa adierazteko.
