Astelehenean bertan jarriko da martxan erreminta Arrasateko hainbat dendetan; horren gaineko xehetasunak eman guran, gaur goizean aplikazioaren kudeatzaileek informazioa helarazi dute herrian zehar.

| Ikusi handiago | Argazki originala

On line bidez Arrasateko dendatara heltzea posible egiten duen aplikazioa da Merkatari. Erreminta honek, komertzio eta dendetako bezeroek euren arteko komunikazioa hobetzea du helburutzat eta,  horregatik txat bitartez komunikazio zuzena sustatzen du. Eskaintzen gaineko informazioa jasotzea zein erosketak baloratzea ahalbidetzen du. Baita tiketak gordetzeko aukera ere.

Erreminta hau bezero zein saltzaileentzat onuragarria izan daitekeela dio aplikazioaren kudeatzaile Raul Uriartek: "Alde batetik salmentak erraztuko dira, eta, gainera, aplikazioak bezeroak dendetara erakarriko ditu. Bestetik, erosketak egiteko laguntza ere eskainiko du Merkatarik; eta, era berean, bezeroak salmenta tokietara gerturatuko ditu". 

Datorren astean ezarriko da

Merkatari astelehenean bertan ezarriko da Arrasateko hiru dendetan; eta, ezagutzera emateko, aplikazioaren kudeatzaileek gaur goizean bertan triptiko batzuen bitartez erremintaren gaineko azalpenak eman dizkiete herritarrei. Aipaturiko hiru dendak Arrasate Zoo, Traskilon eta Rezusta Karri Kirri dira, eta, bertan kudeatzaileak egunean zehar izango dira.  Bertan Merkatari zer den azalduko dutela eta aplikazioaren gaineko funtzionalitate zein abantailen nondik norakoak ere emango dituztela dio Uriartek. Mezua ondo helaraztea  euren asmo nagusia  ere badela esan du kudeatzaileak.

Iturria: goiena.eus