Eroski dagoeneko bada Caprabo taldearen jabea, izan ere, egunotan erosi du haren %100a. Hain zuzen, jabeei, Botet familiari, geratzen zen %16a erosi dio. Zenbatean ez da jakinarazi.

Erosketa prozesua 2007an hasi zen, Eroskik Botet familiarekin eta La Caixa banketxearekin hitzarmena egin zuenean.
Iaz, La Caixak Caprabon zituen akzioen %9 erosi zituen Eroskik, 125 milioiren truke. Orain, Botet familiari geratzen zen %16a erosi dio.

Caprabok 350 supermerkatu ditu Katalunian, Madrilen eta Nafarroan, eta 2011n 1.485 milioi euro fakturatu zituen, 19,4 milioi euroko esplotazio-emaitza izan zuen eta 8,5 milioi irabazi zituen.

Mondragon Unibertsitateak eta Gaiker-IK4 Teknologia Zentroak baterako ikastaroa antolatu dute material konposatuetan adituak prestatzeko. Merkatu gero eta zorrotzagoaren beharrak asetzea da ikastaroaren helburua.

Merkatu horretan, composite materialak arian-arian gainerako materialak ordezkatzen ari dira, besteak beste, arinagoak direlako, korrosioaren edo nekearen kontra erresistentzia handiagoa dutelako eta neurrirako egituren diseinuak ahalbidetzen dituztelako.

Mondragon Taldea New York-en ordezkatuta egongo da bihar, urriaren 11n, Euskal ikonoak munduan izeneko mahai-inguruan. Etxepare Euskal Institutuaren ekimenez antolatu dute eta Mondragon Taldetik Mikel Lezamiz izango da, Mondragon Korporazioko zabalkunde kooperatiborako zuzendaria.

Basque Cultural Exchange in NY da ekimenaren izenburua eta munduan barrena euskal ikono bihurtu diren euskal pertsonaia edo erakundeek hartzen dute parte.

Gaur, urriak 10, esate baterako, amaituko da Anthology film archives filmategiak antolatu duen Gerra zibila Euskal Herrian zikloa. Guztira, 10 emanaldik osatu dute zikloa, eta kultura gune esanguratsu honen ikuslego adituak arreta handiz jarraitu du.