Automozio eta estanpazio arloetako 50 ekoizle baino gehiagok dagoeneko konfirmatu dute jardunaldi hauetan izango direla. Makina erremintaren arloan izandako berrikuntzak aurkeztuko dira bertan.

Datorren aste osoan zehar ate irekien jardunaldiak antolatu dituzte Fagor Arrasate eta Onapresek. Automozio eta estanpazio arloetako 50 ekoizle baino gehiago bilduko dira bertan eta Fagor Arrasateren zein Onapresen produktu berriak aurkezteko balioko du. Izan ere, azken boladan, Mondragoeko kooperatibak instalazio konplexuak egin ditu arlo honetan, batez ere Alemanian. Besteak beste, estanpazioko FlexCell sistema berria aurkeztuko du Fagor Arrasatek, alegia, produktibitatea areagotu eta kostuak murrizten dituen sistema berria.

FlexCell sistema

FlexCell sistemak instalazio bakarrean bi lan egiteko aukera eskaintzen du. Transfer erako prentsak, bata bestearen alboan jarrita, osatzen dute instalazio iraultzailea.
Bisitaldian, gonbidatuek ikusi ahal izango dute nola funtzionatzen duen sistema berriak, Fagor Arrasatek Volkswagen etxearentzat eginiko proiektu baten bitartez.

Onapres, Zamudion

Era berean, ate irekien jardunaldiak aprobetxatuz, gonbidatuek Onapres kooperatibak Zamudion duen lantokia bisitatzeko aukera izango dute.

Iturria: MONDRABERRI.com