Bihar, martitzena, foro bat antolatu dute Ferixalekuan, egitasmo honen inguruan berba egiteko. Bertan, enpresa eta eragile ezberdinei hainbat ideia luzatuko dizkiete eta adituek beren balorazioak emango dituzte.

Arizmendi Ikastolako Lanbide Heziketako erizaintzako ikasleek Lanean ikertuz proiektua jarriko dute martxan. Horretarako, hainbat enpresa eta eragilerekin izan dira eta bihar, martitzena, foto bat egingo dute Ferixalekuan, goizeko 11:30etan, egitasmo honen inguruan berba egiteko. LHko arduradunek hipotesi batekin aritu izan dira azken urte hauetan: erizaintzako laguntzaileak gai dira identifikatzeko zein tresna eta beharrizan izango lituzkeen gaixoak bere ongizatea hobetzeko.

Hipotesi honen harira, aurten, formazioa antolatu dute erizaintzako irakasleek euren ikasleekin hori lantzeko. Formazio saio hauek Farap erakundeko (antropologia aplikatuan adituak) Begoña Pecharromanek eta Tecnaliako Manu Montejo ikerlariak eman zituzten. Formazio saio hauetatik 30 bat ideia atera zituzten ikasleek, gero produktu izateko aukera ematen zutenak. Horregatik Lanean ikertuz proiektua martxan jartzera animatu dira.

Hala, ezinbesteko dute zentro teknologikoekin eta antzeko eragileekin euren egitasmoaren nondik norakoak partekatzea. Hainbat enpresa eta eragilerekin egon ostean, bihar ospatuko da foroa eta bertan, GSR, Aptes, Arrasateko Udaleko teknikariak, Aita Menniko ordezkariak, Debagoieneko ospitalekoak, Etorbizi, Ikerlan, Mondragon Health eta Saludnovako ordezkariak izango dira. Ikasleek hamabi ideia aurkeztuko dute eta gero adituen balorazioak entzungo dituzte.

Iturria: MONDRABERRI.com